Авăн уйăхĕн 24-мĕшĕнче Чăваш Республикин Наци библиотекинче çуллахи каникул хыççăн «Варкăш» литература клубĕ ĕçне малалла тăсрĕ. Хальхинче варкăшçăсем Елена Аксупин «Пилеш куççулĕ» кĕнекине сÿтсе яврĕç. Кăларăм кăçал Чăваш кĕнеке издательствинче кун çути курнă, унта калавсем кĕнĕ.
Автор уява Чĕмпĕр хулинчен килсе çитрĕ. Елена Геннадиевна Тутар АССРĕнчи Аксу районĕнчи Беловка ялĕнче çуралнă, И.Н. Ульянов ячĕллĕ Чăваш патшалăх университетĕнчи чăваш филологийĕпе культура факультетĕнчен вĕренсе тухсан Чĕмпĕрте тĕпленнĕ, çавăнтанпа Чĕмпĕр облаçĕнчи чăвашсен «Канаш» хаçатĕнче вăй хурать.
Кĕреке хуçине саламлама çыравçăсем, журналистсем, вĕрентекенсем, редакторсем тата ытти вулакансем пухăнчĕç. Малтанах автор хăй пурнăçĕпе паллаштарчĕ, литература çулĕ çине епле тухнине каласа пачĕ.