2017 ҫула Петӗр Хусанкай ҫулталӑкӗ тесе хаклама та пулать: кӑҫал литература обществи аслӑ поэтӑмӑр ҫуралнӑранпа 110 ҫул ҫитнине анлӑ паллӑ тӑвать. Чӑваш Республикинчи культурӑпа вӗренӳ учрежденийӗсенче чӑваш халӑх поэтне, Чӑваш АССРӗн К.В. Иванов ячӗллӗ патшалӑх преми лауреатне, Ҫеҫпӗл Мишши ячӗллӗ Чӑваш комсомол премийӗн лауреатне Петӗр Хусанкая халалласа чылай мероприяти иртрӗ: ҫавра сӗтелсем, уҫӑ лекцисем, конференцисем, литература каҫӗсем… Поэт ҫуралнӑ ҫӗр ҫинче те, Тутар Республикинче, Хусанкай ячӗ хыттӑн янӑрарӗ.
Ҫак кунсенче Шупашкарта Раҫҫей Федерацийӗн вӗренӳпе ӑслӑлӑх министерстви, И.Я. Яковлев ячӗллӗ Чӑваш патшалӑх педагогика университечӗ, И.Н. Ульянов ячӗллӗ Чӑваш патшалӑх университечӗ, Чӑваш патшалӑх гуманитари ӑслӑлӑхӗсен институчӗ, Чӑваш Республикин наци библиотеки, Чӑваш Республикин профессиллӗ писательсен союзӗ йӗркеленипе «Петӗр Хусанкайӑн пултарулӑх эткерӗ» пӗтӗм тӗнчери ӑслӑлӑхпа практика конференцийӗ иртрӗ, унта тӗрлӗ регионсемпе ҫӗршывсенчен килнӗ ӑсчахсем, ҫыравҫӑсем, общество деятелӗсем, культурӑпа ӳнер ӗҫченӗсем, студентсем хутшӑнчӗҫ. Мероприяти пирки тӗплӗнрех ҫак каҫӑпа куҫсан пӗлме пулать.