Чӑваш чӗлхи кунӗ умӗн, ака уйӑхӗн 23-мӗшӗнче, Республикӑн тӗп библиотекинче ҫӗнӗ чӑваш ҫырулӑхне йӗркеленӗренпе 150 ҫул ҫитнине халалланӑ пысӑк курав уҫӑлчӗ.
Курав уҫнӑ ҫӗре патшалӑх деятелӗсем, наукӑпа ҫутӗҫ ӗҫченӗсем, Чӑваш Республикинчи тата Раҫҫей Федерацийӗн тӗрлӗ регионӗсенчен килнӗ библиотека ӗҫченӗсем хутшӑнчӗҫ.
Курава Чӑваш Республикин Наци библиотекин ертӳҫи Роза Лизакова уҫрӗ. Вӑл чӑваш ҫырулӑхӗн аталану ҫул-йӗрӗ вӑрӑм та тарӑн пулнине палӑртрӗ. Курав чӑваш халӑхӗн ҫыру культурин историне унӑн пӗрремӗш символӗнчен пуҫласа паянхи цифровизаци тапхӑрӗ таран пӑхса тухма, чӑваш чӗлхе пĕлĕвĕн аталанӑвӗнче паллă йĕр хăварнă ҫынсемпе паллашма, сас паллисемпе сӑмахсен хӑвачĕ пĕтĕм халăх шăпине мĕнле витĕм кӳнине туйса илме май пани ҫинчен каларӗ.
Пухӑннисем умӗнче салам сӑмахӗпе Чӑваш Республикин национальноҫсен тата архив ӗҫӗсен культура министрӗн ҫумӗ Татьяна Казакова тухса калаҫрӗ. Вӑл Ҫӗнӗ чӑваш ҫырулӑхӗ Иван Яковлевич Яковлев аслӑ вӗрентекенӗмӗр, чӑваш халӑхне ҫутта кӑлараканӗ ячӗпе ҫыхӑнни, 1871-мĕш ҫулта чӑваш чӗлхин сасӑ тытӑмӗн уйрӑмлӑхӗсене тӗпе хурса алфавит туни ҫинчен каларӗ. Вӑл пухӑннисене Чӑваш чӗлхи кунӗ ячӗпе, Ҫӗнӗ чӑваш ҫырулӑхне йӗркеленӗренпе 150 ҫул ҫитнӗ ятпа саламларӗ.
Чӑваш Республикин Патшалӑх Канашӗн депутачӗ Николай Николаев чӑвашсен ҫӗнӗ ҫырулӑхӗн халӑхӑн культура аталанӑвӗнчи вырӑнӗ, унӑн обществӑпа политика пӗлтерӗшӗ ҫинчен каларӗ. Курав шкул ачисемшӗн, студентсемпе вӗрентекенсемшӗн, чӑваш чӗлхипе культурине вӗреннӗ чухне лайӑх пулӑшу материалӗ пулса тӑрассине палӑртрӗ.
Курава пуҫтарӑннисен умӗнче ҫавӑн пекех филологи ӑслӑлахӗсен докторӗ Виталий Григорьевич Родионов, филологи наукисен кандидачӗ Атнер Петрович Хусанкай калаҫрӗҫ. Вӗсем Çӗнӗ чӑваш ҫырулӑхӗн пӗлтерӗшӗ ҫинче чарӑнса тӑчӗҫ, курава пысӑк хак пачӗҫ.
Куравра ӗҫлев элеменчӗсем нумай: кунта чӑваш тӗррин тата чӑваш чӗлхин урокӗсене илме, чӑваш сас паллийӗсене перопа ҫырма, совет тапхӑрӗнчи пичет машинипе усӑ курма пулать. Чӑваш тата вырӑс чӗлхисемпе курав ҫинчен аудиообозорсем итлеме май пур.
Наци библиотеки курава йӗркелеме пулӑшнӑшӑн Юрий Виноградова, Атнер Хусанкайа, Виталий Родионова, Геннадий Дегтярева, Алевтина Долгована, Евгений Михайлова, Геннадий Иванов-Оркова, Алексей Кирова, Олег Улангина тата «Формат» реклама агентствине, Николай Плотникова чун-чӗререн тав тӑвать.
Курав ҫӗртме уйӑхӗн 15-мӗшӗччен ӗҫлет.