Поэзине юратакансем авӑн уйӑхӗн 19-мӗшӗнче Чӑваш Республикин Наци библиотекин «Весь Ваш А.П.» илемлӗ куравӑн хӑтлӑ залне «Асрах асамӗ ҫав самантӑн…» кӗнекене пахалама пуҫтарӑнӗҫ. Ӑна вырӑссен аслӑ поэчӗ Александр Пушкин ҫуралнӑранпа кӑҫал 225 ҫул ҫитнине халалланӑ. Сборник Чӑваш кӗнеке издательствинче икӗ чӗлхепе вырӑсла тата чӑвашла кун ҫути курнӑ. Асӑннӑ кӑларӑма пухса хатӗрлекенӗ¸ вырӑсларан чӑвашла куҫараканӗ – чӑвашсен поэчӗ, прозаикӗ, журналисчӗ Василий Гаврилович Кошкин-Кервен. 2024 ҫул уншӑн та юбилей ҫулталӑкӗ пулчӗ, ҫыравҫӑ нарӑс уйӑхӗнче 75 ҫул тултарнине паллӑ турӗ. Василий Кервен – поэзи пуххисен, калавсемпе повеҫсен авторӗ. Вӑл ытти халӑхсен поэзине чӑвашла куҫарать. Уйрӑмах ӑна Александр Пушкинӑн пултарулӑхӗ илӗртет.
Ҫӗнӗ кӑларӑма Александр Пушкинӑн суйласа илнӗ сӑввисем тата «Евгений Онегин» сӑвӑлла романӗнчи ҫаврӑмсем кӗнӗ.
Уявра ҫӗнӗ кӗнекепе тата ҫыравҫӑн пултарулӑхӗпе ҫывӑхрах паллашӑпӑр.
Хӑтлав 217 пӳлӗмре 17.00 сехетре пуҫланать.
Сире хапӑл туса кӗтетпӗр!