Юпа уйӑхӗн 15-мӗшӗнче ҫыравҫӑсем, тӗпчевҫӗсем, таврапӗлӳҫӗсем Чӑваш Республикин Наци библиотекинче Аркадий Русаковӑн «Турхан сӑмахӗ» кӗнекине сӳтсе явма пуҫтарӑнӗҫ.
Аркадий Никандрович Русаков Пушкӑрт Республикинчи Федоровка районне кӗрекен Кинчеккей ялӗнче ҫуралнӑ. 1980 ҫулта Ӗпхӳри медицина институтӗнчен вӗренсе тухнӑ, 1981 ҫултанпа Федоровка салинче район больницинче врач-невролог пулса вӑй хурать (чылай вӑхӑт врач-наркологра, врач-психиатрта ӗҫленӗ). Ҫыравҫӑн сӑвӑ-калав ҫырас пултарулӑхӗ ачаранах туптаннӑ. 1989 ҫултанпа вӑл «Шуратӑл» литература пӗрлешӗвӗн, 2007 ҫултанпа Раҫҫей писателӗсен союзӗн пайташӗ. «Урал сасси» хаҫатра, Шупашкарта тухса тӑракан хаҫат-журналсенче тӑтӑшах пичетленет. Пелепей хулинче кашни ҫул иртекен «Хавхалану ҫӑлкуҫӗсем» сӑвӑ фестивалӗн номинанчӗ тата 2011 ҫулхи дипломанчӗ, Фатих Карим премийӗн лауреачӗ. 2023 ҫулта Казахстанра иртнӗ «Литературӑллӑ Ази» конурсӑн дипломанчӗ. Аркадий Никандрович вунӑ ытла чӑвашла тата вырӑсла кӗнеке авторӗ. Вулакансем ӑна «Чикӗри тӗлпулу», «Эпир кунта хӗҫпе килмен», «Юрату каҫарма чӗнет» тата ытти хайлавӗсем тӑрӑх пӗлеҫҫӗ.
Унӑн «Турхан сӑмахӗ» хайлавӗ – «Чӑваш романӗ» конкурсӑн пӗрремӗш ҫаврӑмӗн ҫӗнтерӳҫи. Историлле роман XVI – XVII ӗмӗрсенчи чӑваш халӑх пурнӑҫӗпе тӗплӗн паллаштарать. Автор темиҫе ӗмӗр каялла пурӑннӑ ҫӗр ӗҫченӗсен шухӑш-кӑмӑлне уҫса парать, вӗсен пурнӑҫӗнчи йывӑрлӑхсем ҫинчен ҫырать. Романра тӗп геройсем ҫӗршыва пусмӑрлакан хурахсенчен хастаррӑн хӳтӗленни пирки, патшалӑхӑн ҫар хӗсметӗнче тӑракан стрелецсемпе казаксен ӗҫӗ-хӗлӗ ҫинчен вуласа пӗлме пулать. Романри тӗп сӑнарсенчен пӗри – Улатӑрта чӑнласах вӑйпут (воевода) пулнӑ Василий Кузьмин. Хайлавра унӑн ӗҫ-хӗлне те хакланӑ. Сюжет юхӑмӗнче тӳресен сӗмсӗрлӗхӗпе, хурахсен ӗҫӗсемпе те тӗл пулать вулакан.
Уявра асӑннӑ кӑларӑмпа тата ҫыравҫӑн пултарулӑхӗпе ҫывӑхрах паллашӑпӑр. Чӑваш литературине кӑмӑллакансене, халӑх историйӗпе кӑсӑкланакансене кӗнеке хӑтлавне йыхравлатпӑр!
Хӑтлав наци литературипе библиографи пайӗнче (201 пӳлӗм) 17.00 сехетре пуҫланать.
Сире хапӑл туса кӗтетпӗр!