Юпа уйӑхӗн 24-мӗшӗнче тӗпчевҫӗсем, ҫыравҫӑсем, журналистсем, таврапӗлӳҫӗсем, вӗрентекенсем, вулакансем Чӑваш Республикин Наци библиотекине Людмила Сачковӑн «Сиксе юхать Хула ҫырми» тата «Иртнӗ кунсен куҫҫулӗ» кӗнекисене сӳтсе явма пуҫтарӑнӗҫ.
Людмила Николаевна Сачкова – литература тӗнчинче паллӑ ят. Прозӑра-и, драматургире-и – пур енӗпе те ӑнӑҫлӑ ӗҫлет пултаруллӑ калем ӑсти, хайлав хыҫҫӑн хайлав шӑрҫалать, романсем те ҫырать. Вулакансем ӑна «Аякри тӑванӑм та ҫывӑхра», «Чӗкеҫӗм, чӗкеҫ», Ытарайми куҫсем», «Шӑпӑрлан», «Ҫеҫенхирти ир», «Ҫиҫӗмпе туслашни», тата ытти хайлавӗсем тӑрӑх аван пӗлеҫҫӗ.
«Сиксе юхать Хула ҫырми» тата «Иртнӗ кунсен куҫҫулӗ» – икӗ кӗнекерен тӑракан историлле роман. Пӗрремӗш кӗнекине Л. Н. Сачкова хушса ҫӗнетнӗ. Хайлавра автор XI – XIII, XVI тата XIX ӗмӗрсенчи чӑваш ялӗн пурнӑҫне сӑнласа панӑ.
Романӑн иккӗмӗш «Иртнӗ кунсен куҫҫулӗ» кӗнекинче автор тӑван ялӗпе ҫыхӑннӑ истори пулӑмӗсене тӗпе хунӑ. Автор хайлавра Граждан вӑрҫи вӑхӑтӗнче йӗркеленнӗ хӑйне евӗрлӗ ирӗклӗ ушкӑн – яла пӗр хушӑ хӗрлисене те, шуррисене те кӗртмен шурӑ ҫухаваллӑ ҫамрӑксем ҫинчен тата ял кун-ҫулӗпе ҫыхӑннӑ виҫӗ комиссар пурнӑҫӗ пирки ҫырса кӑтартнӑ. Автор тӗпчевлӗ, тишкерӳллӗ куҫпа пӑхса вӑрҫа хутшӑннисен пурнӑҫӗпе ӗҫӗ-хӗлне, нуши-терне, шӑпине сӑнарланӑ.
Кӗнекесемпе тата ҫыравҫӑн пултарулӑхӗпе тӗплӗнрех уявра паллашӑпӑр. Чӑваш литературине кӑмӑллакансене, халӑх историйӗпе кӑсӑкланакансене кӗнеке хӑтлавне йыхравлатпӑр!
Тӗл пулу библиотекӑн акт залӗнче (119 пӳлӗм) 14.00 сехетре пуҫланать. Хапӑл туса кӗтетпӗр!
Ыйтса пӗлмелли телефон: (8352) 23-02-17, хуш. 145.