Раштавăн 24-мĕшĕнче Чăваш Республикин Наци вулавăшĕнчи «Варкăш» литература клубĕнче кĕнеке тусĕсем Ольга Австрийскаян «Пĕррехинче кайăк-кĕшĕк картишĕнче…» çĕнĕ повесть-юмахне пахаларĕç.
Кăларăм кăçал Чăваш кĕнеке издательствинче кун çути курнă. Хайлаври ĕç-пуç Аристарх кил-йышĕнче пулса иртет, унпа вулакансене Амам ятлă йытă паллаштарать. Пĕррехинче çулла Аристарх çемийпе Хура тинĕс хĕрринче канма инçе çула тухать. Кайăксене кÿршĕри Марье аппа пăхса тăма килĕшет. Çакăнтан вара чăх-чĕп картишĕнче хĕрÿ самана пуçланать: таврари пĕтĕм хыпара пĕлсе тăракан Чакчак Пакăлтайкин килти кайăксене пурнăç чăнлăхне каласа кăтартать. Тĕлĕнсе те тарăхса кайнă кайăк-кĕшĕк пăлхав çĕклет.