Кӑрлач уйӑхӗн 28-мӗшӗнче Чӑваш Республикин Наци библиотекинче Дмитрий Моисеевӑн «Хуҫасӑр ҫуртри сехет сасси» кӗнеке презентацийӗ пулать.
Ҫӗнӗ кӑларӑм – ҫыравҫӑн иккӗмӗш кӗнеки. Унччен 2022 ҫулта унӑн «Ют пахчари хӑмла ҫырли» калав пуххийӗ тухнӑччӗ. «Хуҫасӑр ҫуртри сехет сасси» те Чӑваш кӗнеке издательствинче кун ҫути курнӑ. Редакторӗ – Ольга Австрийская (Иванова), ӳнерҫи – Анна Никонорова. Аслӑ классенче вӗренекенсем валли хатӗрленӗскерне вуникӗ калав кӗнӗ. Хайлавӗсенче автор паянхи яш-кӗрӗмӗн пурнӑҫне, кулленхи ӗҫӗ-хӗлне ҫутатса парать, ашшӗ-амӑшӗпе ачисем хушшинчи хутшӑнусене пысӑк тимлӗх уйӑрать. Ҫамрӑксем хӑйсене интернет уҫлӑхӗнче шыраҫҫӗ, видеоблогӗсене аталантараҫҫӗ. Тепӗр чухне чапшӑн ҫунни инкек патне те илсе ҫитерет иккен. Кӗнекери геройсем хӑйсен авӑрне туртса кӗрсе каяҫҫӗ те малаллала мӗн пулассине хӑвӑртрах пӗлес килет. Вулакан вӗсемпе пӗрле пӑшӑрханӗ те, савӑнӗ те…
Мӗнлерех вӑл – паянхи самана ачи? Мӗнпе кӑсӑкланать вӑл? Вуланӑ май ҫак тата ытти ҫамрӑксене пӑшӑрхантаракан ыйтусем ҫине автор хурав парать, вӗсен пурнӑҫӗнчи хӑш-пӗр самантсемпе ҫырса кӑтартать.
Уявра ҫӗнӗ кӗнекепе тата ҫыравҫӑн пултарулӑхӗпе ҫывӑхрах паллашӑпӑр. «Варкӑш» клубӑн хастарӗсене тата чӑваш литературине кӑмӑллакансене Дмитрий Моисеевӑн «Хуҫасӑр ҫуртри сехет сасси» кӗнекипе паллашма йыхравлатпӑр.
18 сехетре пуҫланать, 137 пӳлӗм.
Сире хапӑл туса кӗтетпӗр!