Васьлей Митта - Думы и мечты о чувашском - Ку чухнехи хĕрсен çимĕк сăввисем

Ку чухнехи хĕрсен çимĕк сăввисем

Сантал кĕпе тарăхнех

Çитсă кĕпе тăхнам-ха;

Арçын ачи тарăхнех

Ирĕк юрри юрлам-ха.

Йăмран вăрăм турачсем

Чăрăшпала пĕр танах.

Хальхи хĕри-пăраçсем

Арçынпала пĕр танах.

Хĕрлĕ автан чăрсăр мар -

Хур аçинех сăхаймĕ;

Пире йĕкĕт тивме мар -

Сивĕ куçпа пăхаймĕ.

Çиçĕм-аçа çапнă чух

Çăхсăхмашкăн хушмаççĕ;

Йĕкĕт путсĕрленнĕ чух

Ăна сума сумаççĕ.

Ан вĕр, йыттăм, ман çине,

Çапăп патак пур чухне;

Ал хураймăн ман çине,

Путсĕр йĕкĕт ку чухне.

Сӳс-çип ăнса пулсассăн

Ма савнас мар, ах турă!

Йĕкĕт вăл-ку тусассăн

Ма каяс мар кантура.

Ял йыттисем харсăрах

Ял еннелле вĕреççĕ;

Кантуртисем чăнахах

Хĕрарăм май сĕреççĕ.

Ăнса пулман пусисем

Кантăр айне кĕреççĕ.

Хĕре мăшкăл тунисем

Сĕм тĕрмере çĕреççĕ.

Йĕтĕн акнă хирсене

Утра кĕртсе ан ишĕр;

Ку чухнехи хĕрсене

Пӳрнепе те ан тивĕр.

Тăр шыв тăрăлса килчĕ

Пире çипсем çунтарма;

Пулчĕ Юпа тивлечĕ

Хĕр пусмăрне çунтарма.

Ăшă çумăр хыçĕнчен

Тĕнче йăлтах сывалчĕ;

Пусмăр вилнĕ хыçĕнчен

Хĕр ĕмĕрĕ уçăлчĕ.

Чее-чее кайăкне

Часах тытмĕ серепĕр;

Ку чухнехи ыр хĕрне

Арăм тумĕç ирĕксĕр.

Кăçал йĕтĕн пулать сан, -

Тура хупна хатĕр хур!

Куштан çынна эп кайсан

Ман куçăма лачах сур!

Яш ӳсекен чакана

Шыв-шур епле юратмĕ?

Çакă йăваш ачана

Епле чунăм юратмĕ?

Эй, хурчăка, эс паян

Пурпĕр чăхă тытаймăн;

Ан пăх мана эс, пуян!..

Ху мулупа çыхаймăн!..

Çырла пиçнĕ тет тантăш,

Тух, вăрмана кайăпăр!

Ним те çунман халь ман ăш,

Час ак загса кайăпăр!

Лашан сĕлĕ пулсассăн

Ма пăтратни çавăрас?

Загсра минчет тусассăн

Мĕне кирлĕ пуп тавраш?

Манăн савни кăмсамул тет,

Ăслă пуçлă вăл ача;

Çулăм çитнĕ, çимĕк иртет.

Каяп ăна эп качча.

Кĕмĕл тенкĕ çутишĕн

Çав нухратран хаклăрах,

Пăшăрханмăп çуккишĕн,

Ăсĕ мулран хаклăрах.

Пурте пĕрле савăнса

Çĕнĕ туйла тăватпăр:

Пĕрле тату пурăнса

Пурнăç çулне тупăпăр.

Тутлă турăх кĕвелме

Ыр кĕвелек кирлех çав;

Пурнăç çулне йĕрлеме

Ырă юлташ кирлех çав.

Ыр юлташпа тату та

Пурăнмашкăн пулатех;

Тату пулсан, тупата,

Коммун çывăх юлатех.

Çапла, ырă хĕр тантăш,

Качча кайма пĕлмелле;

Ырă пурнăç тумашкăн

Юлташунтан вĕренмелле.

Харăслатса касар-и

Йĕлме тенĕ йывăçа?

Атьăр, хĕрсем, мухтар-и

Коммун тенĕ пурнăçа?

1926

Митта, Ваçлейĕ. Ку чухнехи хĕрсен çимĕк сăввисем / Митта Ваçлейĕ. Çырнисен пуххи. Икĕ томпа тухать. I том. Сăвăсемпе поэмăсем / Ваçлей Митта. - Шупашкар, 2004. - С. 38-40.