Васьлей Митта - Думы и мечты о чувашском

Пушăн 8-мĕшĕ

Инке, паян чаплă кун, -

Чунăм çĕкленет,

Савăннипе çамрăк юн

Хăватлăн вĕрет.

Паян, инке, сирĕншĕн

Чăн ырлăх кунĕ,

Çакă куна илесшĕн

Юхнă ĕç юнĕ.

Паянхи кун тĕнчипех

Чаплă уяв тăваççĕ,

Ĕçлĕх тĕнчин вăйĕпе

Мула юнаççĕ.

Анчах, инке, çакă кун

Кунта çеç хитре,

Муллă çĕрте илем ун

Вăйлă хĕскĕчре.

Çак праçникĕн илемĕ -

Юпа тивлечĕ,

Пирĕн пусмăр вилĕмĕ

Унтан çеç килчĕ.

Инке, Юпа тивлечпе

Пирĕн вĕренес,

Коммунизм ялавне

Çӳлерех çĕклес.

1926

Митта, Ваçлейĕ. Пушăн 8-мĕшĕ / Митта Ваçлейĕ. Çырнисен пуххи. Икĕ томпа тухать. I том. Сăвăсемпе поэмăсем / Ваçлей Митта. - Шупашкар, 2004. - С. 36.