Васьлей Митта

1908 - 1957

Чувашский поэт,
мастер художественного перевода

Тăвалла маршĕ

Чăнкă çул.

Тумхах та тăвалла.

Çак вăл пирĕн çул -

Ĕç çамрăк çулĕ.

Пĕр пăхсан -

Çӳç-пуç йăлт тăмалла,

Тен, чылайăшĕн çаплах та пулĕ?

Анчах, комсомоли,

Эс - парăнми паттăр!

Нимле тăвалла та

Сана хăруш мар.

Маттур çĕкленетпĕр,

Кал-кал хăпаратпăр,

Пире йăтса илчĕ тăвăллă марш.

Пурте мар.

Шăлăнайман çӳп-çап

Чылай,

Пур-ха мĕшĕлтетен мещен те.

Пĕр ик-виç çул хыçран чупсах

Ав - хăшĕ

Ашакла ĕшенчĕç.

Çӳле, комсомоли,

Çӳле, харсăр паттăр!

Нимле тăвалла та

Сана хăруш мар.

Кам çул урлă выртнă -

Хăюллăн çеç таптăр,

Кам йĕрĕнчĕк ертнĕ

Шăлса вăркăнтар!

Çитес пилĕк çул.

Пулмалла

Çĕршывăмăр

Классăр,

Ултавсăр.

Чăн çăлăнăç

Эпĕр унта тупмалла.

Апла тăк,

Эй, харăс

Утаслăр!

Мала, комсомоли!

Çулсем тăвалла.

Ытлах тăвалла тăк -

Çине тăмалла! Мала, комсомоли!

Çулсем такăр мар.

Ытах такăр мар тăк -

Тавай такăрлар!

1932

Митта, Ваçлейĕ. Тăвалла маршĕ / Митта Ваçлейĕ. Çырнисен пуххи. Икĕ томпа тухать. I том. Сăвăсемпе поэмăсем / Ваçлей Митта. - Шупашкар, 2004. - С. 91-92.