Юрий Семендер

Саватер амăшĕ

Яманак ялĕнчи çитмĕлри Кулине
Хушăран килкелет Шупашкар хулине.

Унăн ывăл ачи – хĕрĕхри Саватер –
Агрегат тăвакан заводри инженер.

Уйăх пек çутă кин, хĕвел пек мăнуксем,
Пурăн, теççĕ, кунтах, ватлăху çитнĕçем...

Пĕр–ик каç чиперех çĕр каçать Кулине.
Малалла тем сирет канлĕхне – ыйхине.

Виççĕре вăранать те – куçне хупаймасть,
Тапранас тет – хăй тĕллĕн çулне тупаймасть.

– Ма ытла ир тăратăн–ха, – тет Саватер.
– Ах, ачам, çĕрĕпех ăш вăркать çав хатер:

Кантăкран тинкерет кăвак куçлă ĕне,
Килнĕ тейĕн кунта шыраса хуçине.

Сакăр чăх кунĕпе какалать картара,
Эп вара вĕсенчен инçетре, катара.

Пĕтĕркке сурăха ачашлассăм килет,
Таврăнасчĕ часрах... Илсе кил–ха билет.