Юрий Семендер

Чăваш ен

Геннадий Волкова

Çуркунне, ăшăпа салтăнсан сивĕ тĕвĕ,
Акăшсем çўл тўпе хĕлĕхне перĕнсен,
«Чăваш ен! Чăваш ен!» тенĕ пусăмлă кĕвĕ
Таврара чиркў чанĕн тăрать кĕрлесе.

Канаш урлă каçса инçете ытамлаççĕ
Ăраççей ураççин ăси пек пуйăссем.
«Чăваш ен! Чăваш ен!» - пĕрĕнсе тăсăлаççĕ
Чаплă купăс пĕрмин калаçан вакунсем.

Хумлă-хумлă çамкаллă ăсчах та сăнавçă
Шухăшра сĕвемлет çĕнĕлле ырăсем.
Ма тесен «Чăваш ен» тенинче пурăнаççĕ
Иртнипе пулассин курăнми йĕрĕсем.

«Чăваш ен! Чăваш ен!» Чечексем çурăлаççĕ...
«Чăваш ен! Чăваш ен!» Эй, Кавал та Чикме!
Турăсен тĕнчинче туйăмсем çуралаççĕ
Чăваш ен çĕршывне çĕн асамлăх кўме.