Юрий Семендер

"Ярăмланчĕ шурăмпуç çутă кÿлĕре…"

Сергей Есенин

Ярăмланчĕ шурăмпуç çутă кÿлĕре.
Янăравлă катара карăк ÿхĕрет.

Макăрать саркайăк та, тусĕ çĕтнĕ тем?
Манăн çеç йĕрес килмест, чĕрере – хĕлхем.

Эп пĕлеп: тухан эс каç аслă çул хыçне,
Йышăнăпăр иксĕмĕр утă купине.
Каçăхсах чуптăвăп эп, сар чечек, сана,
Çылăх пулмĕ çулăм пек ялкăшан чуна.

Эс хăвах, ачашăмçăм, хывăн кĕпÿне,
Йăтса кайăп эп сана вĕтлĕх хĕррине.

Карăксем янраччăр-и шавлă ир çинче, –
Ырă тунсăх тĕсĕ пур шуçăм тĕрринче.

Ю. Сементер куçарнă.