Снаряд хуçса антарнă çур юман
Пĕччен-пĕр тăнă аслă çул çинче.
Ĕнер кĕрешнĕ – сусăр вăл паян.
Ĕнер анчах утаттăн эс манпа,
Эпир пĕрлеччĕ вăрçă хирĕнче.
Паян сана амантрĕç минăпа.
Анчах типмен юман тымарĕсем:
Сыв туратне мăнаçлăн кăнтарса,
Юман каллех кăларĕ çулçăсем.
Тивмерĕ мина санăн чĕрÿне:
Пире, хаярлăх вучĕ хыптарса,
Чĕнетĕн эсĕ çапăçу хирне.
Евстафьев, Н. Вилĕмсĕр юман : [сăвă] / Николай Евстафьев // Паттăрлăх кунĕсем. – Шупашкар, 1995. – С. 46.
