Ватă хурăн, тайлăк хурăн хÿттинче
Асапланнă, юн юхтарнă çамрăк чех.
Вулаканăм, тен, эс ху та тавçăран:
Çамрăк йĕкĕт пулнă паттăр партизан.
Урнă йытă-Гитлер вăрçă пуçласан,
Вăрмана вăл тухса кайнă йышпалан.
Тĕпсĕр тарăн шыва кĕнĕ – вăл путман.
Çулăм витĕр сиксе тухнă–вăл çунман.
Халь аманнă... Серби каçĕ хуп-хура,
"Ах, хăçан, хăçан тÿрленĕ-ши суран?"
Ватă хурăн, тайлăк хурăн хÿттипе
Иртсе пынă сербиянка, сар пике.
Хĕр каланă: "Эп славянка, эс славян,
Апла эпĕр, каччă, иккĕн пĕр тăван.
Чĕресем те, ĕмĕтсем те пирĕн пĕр,
Хĕн-хур урлă çĕнтерÿллĕн иртĕпĕр!
Вăхăт çитĕ, шалчи тулĕ фашистсен, –
Тапса сикĕç партизансен лашисем".
Каччă тăнă... Серби каçĕ хуп-хура...
"Ак часах, часах тÿрленĕ ман суран!
Эс славянка, эп славян. Ак пирĕн çул–
Пире кĕтет çĕнтерÿллĕ çапăçу!"
1941.
