«ХĔРЛĔ-ХĔРЛĔ, ХĔРЛĔ МĂКĂНЬСЕМ..»


Хĕрлĕ-хĕрлĕ, хĕрлĕ мăкăньсем,
Виçĕм çул чечеклĕн чĕрлнисем,
Çил çилленчĕ, çил вĕçтерчĕ-çке сире,
Хăйăр хĕртрĕ çеп-çемçе çĕре.

Чĕлтĕрти çеçкеллĕ мăкăньсем,
Виçĕм çул чечеклĕн чĕрлнисем!
Эпĕ — сирĕн хуçăр — инçетре
Выçăхса сĕтĕрĕнсе çÿреп,
Хĕрлĕ-хĕрлĕ мăкăньсене асăнса,
Хĕрлĕ мăкăньсемшăн хуйхăрса.

Йĕлпер хĕрлĕ тăрлă мăкăньсем,
Виçĕм çул чечеклĕн чĕрлнисем,
Çут хĕвеллĕ кăнтăрла ăшши
Каллех çавăрăнса килĕ-ши?
Симĕс çитлĕ çимĕç пахчара
Кĕтсе илейĕр-ши хуçăра?

Хĕрлĕ-хĕрлĕ, хĕрлĕ мăкăньсем,
Виçĕм çул чечеклĕн чĕрлнисем,
Çил çилленчĕ, çил вĕçтерчĕ-çке сире, —
Хуçăр выçă çÿрет инçетре.

1922 ç. пушăн 20-мĕшĕ
Чернигов