Çирĕм ик çын
Утаççĕ каллех.
Çирĕм ик çын
Ывăнас çук халех…
Çивчĕ çиле
Çиессĕн силлет:
Тавра çийĕ
Хирĕçлесшĕн çиле.
Ой, çанталăк –
Çавра çут тĕнче!
Хăмăр шăналăк –
Пĕлĕт тÿпинче.
Çумăр вĕттĕн
Чарусăр пĕрĕхет.
Кĕр каçĕ тĕттĕм,
Çĕре сĕм пĕркет.
Çулĕ вăрăм,
Çулĕ такăр мар.
Кĕр каçĕ – хăрăм.
Пулать такăнма...
Çирĕм иккĕн
Çÿреç ыткăнса.
Куçсем вичкĕн
Пăхаç сăнаса.
Кăвак хуппийĕ
Уçăлчĕ пĕрре.
Çĕр тÿпийĕ
Пулмалла пире!..
Эпĕр тухнă
Чăнлăх шырама.
Пурăн, чухăн,
Вилĕм – харама!..
Кил-çурт пирĕн
Кунтан халь инçе.
Тăван çĕрĕ-хирĕ –
Çавра çут тĕнче...
Кĕр каçĕ тĕттĕм,
Çийĕнче – сĕм çилхе.
Кĕр каçĕ тĕттĕм,
Хуплать çирĕм икке.
Çăлтăр кăтартать
Çул взвод разведчика.
Сив çил юртать,
Ал-урана çыхать.
Çирĕм иккĕн
Утаç малаллах.
Хура çĕр витĕр
Çитĕç пĕр яла...
