Хурăнлăхран мунча шăрши кĕрет,
Чăваш мунчи шăрши.
Ай-хайччĕ, çапăнасчĕ те пĕрре!
Хăçан кĕрĕпĕр-ши?
Хăçан Çавал, Пăла, Сăр хĕрринче
Тар-кирĕке çумран
Ура тупанĕ чул пек хĕриччен
Сĕвелĕпĕр, хăçан?
– Час, лейтенант юлташ, аякрах мар, –
Тет пĕр салтакăм ман. -
Паян мĕнле кăтартрăмăр-ха шар!
Пусмассерен тăшман... –
Каçкÿлĕм тупă ахăрчĕ тепре.
Пăшал тĕрĕслесе,
Чăваш калать: – Пар ăшшине шепрех!
Тĕп пулччăр эсрелсем!
1943
