Айтăр, тантăшсем, каятпăр
      Çапăçу хирне.
Фашистсен ури ан пустăр
      Пирĕн çĕр Çине.
Пĕр хут мар эпир аркатнă
      Тăшмансен çарне...
Айтăр, тантăшсем, каятпăр
      Çапăçу хирне.

Хаклă тăвансем, ан йĕрĕр,
      Ан тăкăр куççуль.
Çапăçу уй-хирĕ витĕр
      Курăнать çĕн çул.
Вут-вăрçă витĕр çĕкленнĕ
      Ирĕклĕ кунçул...
Хаклă тăвансем, ан йĕрĕр,
Ан тăкăр куççуль.

Тĕнчипех телей хĕвелĕ
      Тухĕ ялтăрса:
Кашнинех тивĕç телейлĕ
      Хĕрлĕ Çăлтăрсем.
Хĕрлĕ Çар татах чап илĕ
      Çĕнтерÿ туса...
Тĕнчипех телей хĕвелĕ
      Тухĕ ялтăрса.

Июнĕн 24-мĕшĕ, 1941 ç.