Юрлă-çумăрлă çанталăк
Тăват çул алхасрĕ тек;
Юнлă-çулăмлă çулталăк –
Кашниех çур ĕмĕр пек.
Юрĕ-çумăрĕ татахчĕ...
Пуля – кĕтнĕ çимĕç мар.
Кашни пуля – пĕр салтакчĕ,
Ман юлташчĕ, нимĕç мар.
Урлă-пирлĕ шăхăратчĕ,
Суккăр пуля ши те ши!
Ман пуçа вăл шав шыратчĕ –
Тупĕ-ши те тупмĕ-ши?
Ах, аннем, вилес килместчĕ
Ют çĕрте вунсаккăрта!
Пурăнас тесех сикетчĕ
Яш чĕреçĕм кăкăрта.
Хамăр çĕр енне пăхаттăм
Вĕçмен чух хăруш етре,
Хамăр кил тĕлне шыраттăм
Ăш вăрканă сехетре.
Ман чĕрем сире сунатчĕ:
"Пулăр ирĕк, ĕмĕр сыв!"
Хамăр кил пек туйăнать-çке
Манайми Тăван çĕршыв.
Çавăнпа эп тупа турăм
Çапăçмашкăн çич ютпа,
Фашиста хăйне тĕп турăм –
Ан юнатăр тек вутпа!
Каçарсам, аннем, кÿмерĕм
Парнесем ют çĕршывран:
Хаклăран хакли вăл терĕм
Çĕнтерÿ – парнеçăм ман!
1947
Артемьев, А. Чи хаклă парне : [сăвă] / Александр Артемьев // Паттăрлăх кунĕсем. – Шупашкар, 1995. – С. 81.
